Sot në Kolegjin ISPE patëm të ftuar kandidatin për kryetar të Komunës së Prishtinës, z. Arban Abrashi në një debat me studentët.
Përgjatë debatit z. Abrashi u koncentrua më shumë në projektet konkrete që ai ka, në rast se fiton garën e balotazhit që zhvillohet me 19 Nëntor.
Ai potencoi që përmes qindra takimeve që ka pasur me qytetarët e komunës së Prishtinës ka evidentuar shumë probleme të tyre, të cilat me raste kanë qenë fatkeqësisht edhe bazike sipas z. Abrashi.
Kandidati në fjalë kryesisht u koncentrua në plan programin e tij të cilin synon që ta realizoj përgjatë periudhës 2017-2021 në rast të fitores.
Pikat kyçe të tij ishin investimet në shëndetësi ku planifikohet ndërtimi i dy qendrave të mjekësisë familjare, të ndërtohet spitali i Prishtinës dhe punësimi i afro 100 specializantëve mobil të cilët do t’i shërbenin invalidëve, moshës së shtyrë dhe grave shtatzëna nëpër shtëpitë e tyre.
Pikë tjetër me rëndësi ishte edhe fondi i punësimit të cilin z.Abrashi tha që ‘’ përmes të hyrave vetanake të komunës mund të ndahet një fond i caktuar fillimisht prej 1 milion euro për përkrahjen e bizneseve të reja me ide kreative dhe funksionale që mund të gjerojnë vende të reja të punës.
Ai përmendi me fokus të veçantë edhe zonën ekonomike, zgjerimin e rrjetit të termokosit, arsimin ku u cek ndërtimi i minimum 7 shkollave të reja të cilat do të jenë në vendbanime më të mëdha ku përmes këtyre investimeve do të largohej ndërrimi i tretë nëpër shumë shkolla.
z.Abrashi gjithashtu premtoi që tatimi në pronë i cili është ngritur në 400% e nuk është rikthyer me investime do të ulet në shifrat e vitit 2013.
Gjithashtu kandidati i LDK-së u ballafaqua edhe me pyetjet e shumta nga studentët të cilat kishin të bënin me trafikun urban, problemet e komunikacionet në kohën e pikut dhe parkingjet, për top 3 prioritet e tij por gjithashtu nuk mbeti pa u pyetur edhe rreth koalicioneve të mundshme para balotazhit të 19 Nëntorit, ku z.Abrashi potencoi se janë në bisedime më të detajzuara me Aleancën Kosova e Re.
Kolegji ISPE do të vazhdoj që të organizojë debatet e këtilla me kandidatët e balotazhit me qëllimin që studentët tanë të kenë rastin nga afër të dëgjojnë dhe t’i pyesin kandidatët e komunave të tyre përkatëse.